Un ano máis, dende a Asociación Profesional Apropiga -que agrupa ós traballadores do Servizo Público de Prevención e Defensa contra Incendios Forestais da Xunta de Galicia (Spdcif) queremos manifestar o noso rexeitamento ó cese levado a cabo pola consellería de Medio Rural, onte 30 de novembro, dos traballadores fixos descontinuos pertencentes ás diferentes categorías profesionais de bombeiros forestais que forman parte deste Servizo Público: emisoristas, oficiais de incendios, vixilantes fixos, condutores de vehículos motobomba, e persoal de brigadas.
Un total de 626 traballadores do Servizo Público de Prevención e Defensa Contra Incendios Forestais da Xunta de Galicia (Spdcif) van ser cesados unha vez mais ó cumplirse os 9 meses de contrato de traballo que a Consellería de Medio Rural estipula para eles este ano 2016. Estes traballadores constitúen aproximadamente un tercio do total de medios dos que dispón a Consellería para facer fronte as tarefas de prevención e extinción en toda Galicia e non volverán a ser contratados ata mediados do mes de febreiro ou comezos do mes de marzo do ano 2017.
A estes 626 profesionais, habería que engadir ós 436 profesionais cesados o pasado 30 de setembro que teñen contratos de 3 meses e, cuxa situación de precariedade laboral volvemos denunciar diante da opinión pública.
De todos é coñecido o principio de que unha boa prevención nos meses de menor risco reducirá, en boa medida, a virulencia e intensidade dos lumes nos meses de maior incidencia de incendios forestais. Pero para que isto se cumpra consideramos que é fundamental contar con todos os medios dos que dispón a Consellería para levar adiante, tanto os traballos de prevención (tan necesarios nestes meses), como as labores de extinción dos lumes que teñen lugar no outono e no inverno diante da constación da desestacionalización dos incendios forestais constatada durante os últimos anos.
Convén destacar que a continuidade destes traballadores non supón un custo inasumible para as arcas públicas xa que pasarían, de cobrar o subsidio por desemprego, a cobrar por facer labores de prevención e extinción para as que son moi necesarios. E a administración deixaría así de malgastar os cartos de todos cando privatiza servizos públicos cara a empresas privadas que ela debería asumir directamente.
Porque -hai que dicilo- foron eses mesmos traballadores fixos-descontinuos agora cesados os que loitaron contra os 2.350 incendios forestais declarados durante este ano de nefastas consecuencias con 20.347 hectáreas ardidas. E para que o ano que ven non se volva repetir o deste verán, é preciso realizar a prevención necesaria que permita o traballo dos medios para tentar evitar a propagación dos incendios forestais cando se produzan.
Dende Apropiga, esiximos que estes traballadores non sexan cesados e que se arbitren medidas para que o seu traballo continúe durante os 12 meses aproveitando as súas capacidades non só nas labores de extinción, senón para as necesarias labores de prevención que se deben desenvolver nos periodos de baixo risco. Instamos igualmente á consellería a que poña fin á precariedade dos traballadores do Spdcif fixos descontínuos de 3 meses que xa foron cesados..
Un servizo público profesionalizado de prevención e loita contra os incendios forestais en Galicia,non pode basearse na precarización dos seus traballadores. Un modelo eficaz non pode basearse na fragmentación, a privatización e a precarización dos seus traballadores, senón nun modelo público e único, o Spdcif.
