Varela Zapata con estudantes internacionais do campus de Lugo, nun enclave do Camiño de Santiago
Un grupo de máis de 30 estudantes universitarios internacionais que están a completar unha estadía formativa no campus de Lugo, na súa maioría a través do programa Erasmus, gozaron da súa primeira experiencia xacobea tras completar a pé o treito do Camiño de Santiago que vai desde Triacastela ata Samos.
Esta actividade, promovida desde a Vicerreitoría de Coordinación do campus de Lugo a través do seu plan de internacionalización da sede universitaria luguesa, permitiu ao alumnado foráneo coñecer diversas localizacións da provincia de Lugo e a forma de vida das súa xentes a través dunha práctica saudable como o foi esta camiñada.
O adxunto á Vicerreitoría de Coordinación do campus de Lugo para Estudantes, Internacionalización, Cultura e Servizos, Jesús Varela Zapata, e o coordinador do Centro de Linguas Modernas da USC no campus de Lugo, Manuel Fernández Méndez, acompañaron á delegación estudantil durante esta andaina polo Camiño Francés, ao tempo que serviron de guías da delegación estranxeira.
Unha vez rematada a camiñada, a delegación universitaria detívose en Samos para repoñer forzas. Despois de xantar, os participantes nesta actividade, orientada a favorecer a inmersión dos estudantes estranxeiros nas formas de vida e nas manifestacións culturais da provincia de Lugo, desprazáronse en autobús ata a localidade de Portomarín, onde tamén tiveron a ocasión de coñecer e gozar da beleza deste enclave xacobeo da provincia de Lugo.
Esta andaina xacobea serviu de colofón das accións específicas impulsadas desde a Vicerreitoría de Coordinación do campus de Lugo no marco do seu plan de internacionalización, un programa que, ademais das recepcións institucionais tanto na Vicerreitoría de Coordinación como no Concello e na Deputación de Lugo, tamén incluíu unha diversas visitas e percorridos guiados por áreas rurais da capital luguesa, a través das que o público visitante gozou dos recursos naturais de que dispón o concello de Lugo e coñeceu parte do seu rico patrimonio artístico e cultural.
